Andrea Pirlo thotë se dëshiron ta shfrytëzojë Cristiano Ronaldon në krahun e majtë të sulmit me tre futbollistë (së bashku me Paulo Dybala dhe Alvaro Morata), pasi të jetë në gjendje që të luajë sërish.
Superylli portugez është duke i munguar Zonjës së Vjetër pas diagnostikimit me coronavirus, ndërsa kampioni regjistroi barazimin e tretë në Serie A të dielën mbrëma (1-1 ndaj Hellas Veronas).
Juve shpreson që Ronaldo të dalë negativ në testin për COVID-19 së paku 24 orë para ndeshjes ndaj Barcelonës (që zhvillohet të mërkurën mbrëma), në mënyrë që ta ketë në dispozicion, megjithëse diçka e tillë duhet të konfirmohet nga UEFA.
“Po mendojmë të luajmë me të tre (Ronaldo, Dybala dhe Morata) në sulm. Me Ronaldon në pozitën e tij klasike në pozitën e sulmuesit të majtë”, ka thënë Pirlo në konferencën për shtyp.
Ndryshe, pos barazimit, në ndeshjen ndaj Veronas u lëndua edhe Leonardo Bonucci duke iu bashkuar kështu Giorgio Chiellinit në listën e të lënduarve. /Telegrafi/
