Një replikë e ashpër ka ndodhur sot në Kuvendin e Kosovës, ndërmjet kryetares së Kuvendit, Vjosa Osmani dhe deputetit të Lidhjes Demokratike të Kosovës, Driton Selmanaj.
Selmanaj tha se Gjykata me aktgjykimin e saj i ka dhënë kohë Qeverisë dhe Kuvendit që deri më datën 13 eventualisht të ndërmarrin masa nëse vlerësojnë që me ligj dëshirojnë të kufizojë liritë dhe të drejtat e njeriut në Kosovës dhe ka ardhur në përfundim se sjellja e Qeverisë për kufizimit e lirive dhe të drejtave të njeriut ka shkelur Kushtetutën.
Përndryshe, sipas tij, kalohet në nenin 56 ku flitet për shmangien e lirive dhe të drejtave të njeriut e që bëhet në rastet kur shpallet gjendja e jashtëzakonshme.
“Por përpjekja ose interpretimi që ju po i bëni është përpjekje për me legjitimua sjelljen e kësaj qeverie duke e lënë anash nenin 56”, iu drejtua Selmanaj, Vjosa Osmanit.
Pas kësaj, Osmani kërkoi t’i ndalet fjala deputetit Selmanaj, duke i thënë se po i dezinformon qytetarët.
“Kjo qasje autoritare e juaja po më ngjan në dikë tjetër, por jo me juve”, ia ktheu Selmanaj.
Më pas iu ndërpre fjala deputetit të LDK-së.
“Në momentin që më ofendoni mua natyrisht që unë ja u ndali fjalën. Nuk ta jap fjalën, ofendimet nuk ua lejoj askujt hiq”, tha Osmani
Kryetarja e Kuvendit ia tha fjalën pas kësaj shefit të Grupit parlamentar të LDK-së, Arben Gashi.
Ai i tha Osmani se deputetit Selmanaj iu mohua e drejta e fjalës.
“Prej fillimit të seancës është folur edhe për çështje tjera…”, tha ai.
Lidhur me këtë Osmani tha se deputetët tjerë nuk e ofenduan atë, ndërsa Selmanaj po. /Telegrafi/