Raketat ruse kanë goditur një digë rezervuari pranë qytetit jugor të Ukrainës, Kryvyi Rih, thonë zyrtarët.
Sipas BBC, përcjell Telegrafi, banorëve në disa zona iu tha të evakuoheshin, tha kreu i qytetit Oleksandr Vilkul, por ai shtoi se situata ishte nën kontroll.
Ukraina tha se sulmi ishte hakmarrje nga Rusia për kundërsulmin e saj të fundit.
Presidenti Volodymyr Zelensky – i cili është lindur në qytet – e përshkroi Rusinë si një “shtet terrorist” pas sulmit në rezervuarin Karachunivske.
“Ju jeni të dobët që luftoni civilët”, tha Zelensky në fjalimin e tij të mërkurën vonë natën. “Të poshtër që, pasi janë arratisur nga fusha e betejës, po përpiqen të bëjnë dëm nga diku larg”.
Kjo ishte një referencë e dukshme për sukseset e fundit ushtarake të Ukrainës në një kundërofensivë të shpejtë në rajonin verilindor të Kharkiv të vendit. Ushtria e Ukrainës ka rimarrë pjesë të territorit të pushtuar, duke i detyruar trupat ruse të tërhiqen.
Në fjalimin e tij, Zelensky tha se rezervuari “nuk kishte fare vlerë ushtarake”.
Vilkul tha se gjatë natës u kryen dy shpërthime për të rritur rrjedhën e ujit nga diga në lumin Inhulets.
Furnizimi me ujë u prek nga sulmi në qytet, i cili kishte një popullsi paraluftës prej më shumë se 600,000 njerëz.
Uji depërtoi përmes digës dhe vërshoi brigjet e lumit, duke përmbytur disa shtëpi, thanë zyrtarët.
Të enjten në mëngjes, Vilkul tha se nivelet e ujit në lumin Inhulets tani “kanë rënë ndjeshëm”. Ai tha se nuk kishte viktima. /Telegrafi/