Policia e Kosovës ka bërë të ditur për një plagosje në Vushtrri, për shkak të një konflikti për parking dy persona janë përleshur, ndërkaq është plagosur një tjetër person që ka tentuar t’i ndajë.
Policia bën të ditur se rasti ka ndodhur të mërkurën në Vushtrri në orën 04:20.
“Është raportuar se viktima mashkull kosovar ishte dërguar në emergjencën e spitalit në Vushtrri e më pas edhe në QKUK për shkak se ishte plagosë me armë zjarri nga një i dyshuar mashkull kosovar. Rasti ka ndodhur në një parking ku dy persona të dyshuar pas një konflikti verbal ishin përlesh në mes veti, pastaj viktima kishte hyrë mes tyre për t’i ndarë dhe ishte plagosë nga njëri prej të dyshuarve, i cili kishte ikur dhe gjendet në arrati”, thuhet në raport.
Në vendin e ngjarjes kanë dalë njësitë relevante të policisë dhe prokurori kujdestar, ndërkaq janë gjetur dhe sekuestruar dy gëzhoja dhe një predhë e fishekëve.
Lidhur me rastin janë arrestuar dy të dyshuar meshkuj kosovarë dhe është sekuestruar një pistoletë e cila dyshohet se ishte përdorë në rast. Rasti vazhdon të hetohet. /Telegrafi/