Drejtori i shkollës “Flamuri i Arbrit” në Suharekë ka raportuar në polici se është duke u kanosur nga një grup i personave përmes rrjeteve sociale.
Sipas raportit të policisë thuhet deri te kanosja e tij ka ardhur si pasojë e largimit nga puna të një mësimdhënëseje.
“Ankuesi mashkull kosovar (drejtor shkolle) ka raportuar se si pasojë e largimit nga puna të një mësimdhënëseje përmes rrjeteve sociale është duke u kanosur nga një grup i personave, ku njëri prej tyre është i dyshuari mashkull kosovar”, thuhet në raportin e policisë.
Ndryshe ditë më parë u raportua se arsimtarja e matematikës, Remzie Lezi është përjashtuar nga një shkollë në Komunën e Suharekës për shkak se mbante shami.
Sipas një dokumenti të publikuar në rrjete sociale, Këshilli Drejtues i Shkollës ka vendosur në mënyrë unanime, që Lezi të përjashtohej nga shkolla.
“Duke u mbështetur në UA NR 03/2016, neni 3 pika 7, që ndalon bartjen e uniformës fetare, i gjithë Këshilli unanimisht vendosi, që nuk i lejohet arsimtares së matematikës, z. Remzie Lezi të ushtrojë profesionin e mësuesisë në shkollën tonë me uniformë fetare”, thuhet në dokument.
Lidhur me këtë qështje kishte reaguar edhe kryetari i Komunës së Suharekës, Bali Muharremaj.
Muharremaj u shpreh se mësimdhënësja vazhdon detyrat derisa ndaj saj nuk ka ndonjë procedurë disiplinore. Ai tha se bordi i prindërve nuk mund të përjashtojë apo punësojë mësimdhënës.
“Bordi i prindërve nuk është institucion, i cili punëson apo largon një mësimdhënës nga puna. Kjo ndodh në organet komunale më një procedurë tash të rregulluar mire. Në qoftë se ndonjë mësimdhënës ka rast disiplinor, atëherë është Komisioni Disiplinor që e trajton rastin dhe i sugjeron drejtorit, respektivisht mua si kryetar për veprimet institucionale. Deri në një rast të tillë, të gjithë mësimdhënësit ushtrojnë detyrat e veta konform procedurës së lartpërmendur”, kishte shkruar Muharremaj. /Telegrafi/