Anëtari i kryesisë së PDK-së, Betim Gjoshi ka thënë se Banka Qendrore e Kosovës është shndërruar në strehë të militantëve të Albin Kurtit.
Gjoshi në një postim në Facebook, ka shkruar se BQK kohëve të fundit ka vepruar me urdhra politikë që i shërbejnë agjendës politike të partisë në pushtet, LVV-së.
“Banka Qendrore e Kosovës, më së paku është e Kosovës, por një strehë e militantëve të Albin Kurtit, që shërbejnë si kukulla për lojëra politike.
Prej fundit të vitit të kaluar dhe gjatë gjithë janarit e deri më tani në shkurt, BQK ka vepruar me urdhra politikë që i shërben agjendës politike të një partisë në pushtet”, ka shkruar Gjoshi.
Ai më tej ka theksuar se “pavarësia” e BQK-së i shërbeu Kurtit vetëm për tu përplasur me aletarët e Kosovës në Këshill të Sigurimit.
“BQK-ja e çoi flamurin e bardhë dhe e dorëzoi pavarësinë (të rrejshme) pas urdhrit politik të Albin Kurtit.
“Pavarësia” e BQK-së i shërbeu Kurtit vetëm për t’u përplasur me aleatët e Republikës së Kosovës që shkoi deri në Këshillin e Sigurimit, sikur të ishte një dhuratë e rënë nga qielli për Serbinë, Rusinë dhe Kinën”, ka shkruar Gjoshi. /Telegrafi/
