Dhoma e Ulët e parlamentit rus ka dhënë miratimin përfundimtar për një ligj të ri që do t’i lejojë autoritetet të konfiskojnë pasuritë e njerëzve të dënuar për përhapjen e qëllimshme të lajmeve të ‘rreme’ rreth ushtrisë.
Duma ruse miratoi ligjin në leximin e tretë dhe të fundit, njoftoi kryetari i dhomës së ulët Vyacheslav Volodin në kanalin e tij zyrtar Telegram.
Masa do të zbatohet gjithashtu për ata që shpallen fajtorë për “diskreditimin” e forcave të armatosura, ata që bëjnë thirrje për sanksione kundër Rusisë dhe ata që shpallen fajtorë për inkurajimin e aktivitetit ekstremist, transmeton Telegrafi.
Ligji i ri, i cili ende nuk është miratuar nga dhoma e lartë e parlamentit dhe presidenti Vladimir Putin, do të lejojë gjithashtu shtetin të konfiskojë asetet e rusëve që janë larguar nga vendi dhe kanë kritikuar luftën në Ukrainë, dhe të vazhdojnë të mbështeten në të ardhurat duke dhënë me qira shtëpitë ose apartamentet e tyre në Rusi.
Kjo është një prej disa metodave të shumta që Putini i aplikon kundër të gjithë atyre që mendojnë ndryshe nga ai dhe që marrin guximin ta kundërshtojnë. /Telegrafi/