Trajneri i Kombëtares së Shqipërisë, Christian Panucci, e ka paditur në gjykatë ish-presidentin shqiptar, Bujar Nishani.
Padia është dorëzuar në dhomën civile të Gjykatës së Tiranës, ku trajneri italian kërkon të dëmshpërblehet nga Nishani me një vlerë prej 100.000 eurosh.
Ky dëmshpërblim kërkohet, pasi ish-presidenti pas ndeshjes miqësore të futbollit mes Shqipërisë dhe Kosovës, ku Shqipëria u mund 3-0, është shprehur për Panuccin se është një “sharlatan që shkatërron edhe atë që ishte ngritur”, transmeton Top Channel.
Për këtë reagim të Nishanit, trajneri i kombëtares kërkon 100 mijë euro në formë dëmshpërblimi për dëmin moral që i është shkaktuar në publik.
Shorti ka përzgjedhur gjyqtaren Anila Karanxha për shqyrtimin e kësaj padie, ndërsa ende nuk është caktuar data për seancën e parë.
Ky është precedenti i parë që trajneri i kombëtares së futbollit kërkon një dëmshpërblim të tillë për reagimet nga njerëz të politikës apo ish-drejtues të lartë të shtetit, pas humbjes së ekipit kombëtar.
Kujtojmë që në miqësoren e muajit prill, Kosova fitoi me rezultat 3-0 kundër Shqipërisë, duke regjistruar asokohe fitoren e tretë nën drejtimin e Bernard Challandes.
