Sekretari i përgjithshëm i NATO-s, Mark Rutte, do të qëndrojë në Kosovë nesër, më 11.03.2025.
Rutte do të pritet në takim nga presidentja e Kosovës, Vjosa Osmani, si dhe nga kryeministri, Albin Kurti.
Presidenca e Kosovës ka njoftuar se takimi Osmani-Rutte do të nisë në ora 13:45, me ç’rast mediat do të mund të marrin pamje nga pritja dhe fillimi i takimit.
Pas takimit, presidentja Osmani dhe Sekretari i Përgjithshëm i NATO-s do të mbajnë konferencë për media.
Më pas, shefi i NATO-s do të pritet nga kryeministri Albin Kurti.
Sipas Zyrës së Kryeministrit, takimi Kurti-Rutte do të nisë në ora 14:50 në ndërtesën e Qeverisë.
Gjithsej 4.686 trupa nga 29 vende të botës shërbejnë aktualisht në Kosovë, në kuadër të misionit paqeruajtës të Organizatës së Traktatit të Atlantikut Verior (NATO), KFOR.
Më shumë se gjysma e forcave janë nga Italia, Shtetet e Bashkuara të Amerikës, Hungaria dhe Turqia.
NATO-ja e ka shtuar praninë e saj në Kosovë gjatë vitit 2023, pas rritjes së tensioneve në veriun e banuar me shumicë serbe.