Deputeti nga radhët e Lëvizjes Vetëvendosje, Enver Haliti, ka thënë se kërkesat e veteranëve të luftës për rritje të pensionit janë legjitime. Por sipas tij, ata po përdoren për kauza të rrejshme nga partitë opozitare.
Ai i ka akuzuar partitë opozitare se me qëllim po tentojnë që ta paraqesin kryeministrin Albin Kurti, se është kundër UÇK-së, por që sipas tij, kjo nuk qëndron.
I ftuar në emisionin “Five”, të RTV Dukagjinit, Haliti ka thënë se pret që pas takimit të së premtes në mes të përfaqësuesve të veteranëve të luftës dhe kryeministrit Albin Kurti, do të gjendet një zgjidhje për këto kategori.
Për gjendjen jo të mirë të veteranëve, Haliti fajin ua ka lënë partive opozitare, që sipas tij, nuk janë përkujdesur për ta.
“Opozita dëshiron të ndërhyjë në planet e Qeverisë, dhe t’i tregojë asaj se si duhet të zgjidhen këto probleme që nuk i kanë zgjidhur që 23 vite”, ka thënë ai.
Tutje, ai ka thënë se në seancat e ardshme, deputetët e opozitës nuk do të mund ta bllokojnë punën e Kuvendit të Kosovës, pasi sipas tij, në seancën e së enjtes, pozita ka pasur mirëkuptim, por kjo nuk do të ndodhë pafundësisht.
Sipas tij, opozita me qëllim po tenton ta pengojë punën e Kuvendit, për t’u mos miratuar ligjet që po i sjell Qeveria.
Ai ka bërë të ditur se me datën 23 do të ketë seancë të re të Kuvendit të Kosovës, kurse vazhdimi i seancës të së premtes do të caktohet pas mbledhjes së Kryesisë së Kuvendit.
Sipas Halitit, krahasimet kur Lëvizja Vetëvendosje e bllokonte Kuvendin e Kosovës, me bllokimet e fundit të opozitës, nuk qëndrojnë, pasi siç thotë ai, kauzat e partisë që e përfaqëson ishin të drejta./Portali D/