Policia e Kosovës ka arrestuar pesë persona të dyshuar për përfshirje në veprën penale “blerje, posedim dhe shitje e paautorizuar e narkotikeve, substancave psikotrope ose analoge” dhe ka konfiskuar një sasi lëndësh që dyshohet të jenë narkotikë.
Siç njofton Policia e Kosovës, Drejtoria për Hetimin e Trafikimit me Narkotik-Njësia Prishtinë, ka zhvilluar një hetimi rreth tremujorë kundër një grupi të personave të dyshuar për përfshirje në veprën penale “Blerja, posedimi dhe shitja e paautorizuar e narkotikeve, substancave psikotrope ose analoge”.
Në njoftim thuhet se më 27.10.2018, njësiti i antidrogës të ndihmuar edhe nga Njësia për Reagim të Shpejtë, ka planifikuar arrestimin e personave të dyshuar. Në ora 21:00, në rrugën Prishtinë-Mitrovicë, ka ndalur veturën me targa vendore në të cilën ndodheshin katër persona. Të dyshuarit që gjendeshin në veturë ishin tre shtetas kosovarë dhe një i shqipëris: F.R. (1990), A.H. (1989), K.B. (1998) shtetas i Shqipërisë dhe A.I. (1998).
“Gjatë kontrollit të veturës janë gjetur dy qese me narkotike të llojit marihuanë me peshë prej 3.3 gram dhe një shufër metalike. Gjatë kontrollit trupor, tek i dyshuari F. R, janë gjetur pesë qese me bari ngjyre të gjelbër e dyshuar si marihuanë me peshë prej 7.4 grame dhe 50 euro para te gatshme. Tek i dyshuari A. H, janë gjetur dymbëdhjetë qese me narkotike të llojit marihuanë me peshe prej 17.6 gramësh dhe para te gatshme ne vlere prej 70 euro. Tek i dyshuari K.B, janë gjetur 200 euro para të gatshme të gjitha nga 5 euro që dyshohet të jenë fituar nga shitjet e narkotikeve”, thuhet në njoftim.
Në konsultim me prokurorin kujdestar dhe me urdhër verbal të Gjyqtarit të Procedurës Paraprake është bërë kontrollimi i shtëpisë se të dyshuarit F.R. dhe në banesën e personave të dyshuar (banesë e shfrytëzuar bashkërisht nga të katër të dyshuarit), ku janë gjetur: 14 paketime me të mëdha me marihuanë me peshe 718.1 gramë, një paketim me marihuanë peshë 1006 gram , 1 paketim me marihuanë me peshë prej 503.4 grame si dhe 153 qese te vogla te mbushura me narkotike te llojit marihuanë të gatshme për shitje me peshë prej 234.8 gram, dy peshore elektronike, rreth 200 qese të zbrazura sikur ato te cilat janë paketuar narkotiket për shitje, pasaporta e personit të dyshuar shtetas i Shqipërisë si dhe një fletore me shënime për shitje të narkotikeve. Të gjitha këto dhe vetura e të dyshuarave janë konfiskuar.
Pas intervistimit të personave të dyshuar, me vendim te prokurorit të krimeve të renda, ata dërgohen në qendrën e mbajtjes.
Policia gjithashtu bën të diturs e njësia e njëjtë policore, më 26.10.2018, pas marrjes së lejes nga organet e drejtësisë, ka kontrolluar në Prishtinë banesën e një të dyshuari, B.M. (1975). Aty janë gjetur dhe konfiskuar 110.1 gram substancë narkotike, dyshohet të jetë heroinë dhe rreth 9 gram substancë që dyshohet të jetë marihuanë.
I dyshuari, me vendim të prokurorit dërgohet në mbajtje. /Telegrafi/
