Matthijs de Ligt këtë verë refuzoi rinovimin me Juventusin duke zgjedhur të transferohet te Bayern Munichu.
Qendërmbrojtësi holandez që çoi në arkat e bardhezinjve 67 milionë euro plus 10 të tjera në formë bonusesh, bëri debutimin me Bavarezët duke fituar dhe trofeun e tij të parë ne skuadrën e re, Superkupën e Gjermanisë pasi mposhtën 5-3 Leipzigun, së fundmi bëri edhe debutimin edhe në Bundesligë në fitoren 6-1 ndaj Eintracht Frankfurtit, për t’u rikthyer të flasë për transferimin në Bavari.
“Kisha edhe dy vite kontratë me Juven, aty u bëra një mbrojtës i kompletuar, por e ndjeva që kishte ardhur momenti për një sfidë të re, një ambient të ri. Në qershor Bayern Munichu më kontaktoi dhe isha menjëherë i interesuar. Stili i lojës së Bayernit më përshtatet pasi është një skuadër sulmuese”, deklaroi fillimisht De Ligt.
Ndërkohë holandezi foli edhe për presionin që vjen kur një klub paguan kaq shumë për një mbrojtës.
“Kur luan për një klub të madh si Bayerni, ka gjithmonë presion. Nuk ka rëndësi, kjo ndodh edhe nëse vjen me parametra zero. Me siguri që nuk më intereson mua, pasi kërkoj gjithmonë kaq shumë nga vetja, sa kam gjithmonë mjaftueshëm presion”, shtoi mbrojtësi.
Në fund edhe një koment në lidhje me kundërshtarët më të fortë me të cilët është përballur në aspektin individual.
“Cristiano Ronaldo dhe Lionel Messi janë natyrisht të nivelit botëror, por kundërshtari që më ka krijuar më shumë probleme deri tani ka qenë Leroy Sane, në një ndeshje mes Holandës dhe Gjermanisë”, potencoi më tej holandezi. /Telegrafi/