Ish-shefi i agjencisë hapësinore ruse Roscosmos, Dmitry Rogozin, i cili ditë më parë u plagos nga granatimet ukrainase në Donetsk, pritet t’i nënshtrohet sot një intervenimi kirurgjik.
E pavarësisht se Kremlini po tenton ta fshehë raportimin e disa mediave të pavarura ruse, se ish-zëvendëskryeministri i Rusisë është në rrezik të mbetet i paralizuar nga copëzat e granatës që i kanë mbetur në trup, Moska ka konfirmuar se ai sot do t’i nënshtrohet një ndërhyrje kirurgjikale.
Rogozin ishte duke qëndruar brenda një hoteli në Donetsk me disa këshilltar tjerë të ushtrisë ruse, kur ukrainasit filluan një sulm në të cilin ish-kreu i Roscomos mbeti i plagosur në shpinë.
Në ato momentet kur ukrainasit filluan sulmin, me të kishte qenë edhe Vitaly Hotsenko, kryeministër i “Republikës Popullore” të vetëshpallur të Donetskut, transmeton Telegrafi.
Rogozin konsiderohet si njeri i afërt i Putinit, i cili kohë më parë pati bërë thirrje për lirimin e kriminelëve serbë të luftës Radovan Karaxhiq dhe Ratko Mlladiq dhe kishte kërcënuar Malin e Zi me sulme ushtarake.
Në fillim të qershorit kërcënoi Bullgarinë, Maqedoninë e Veriut dhe Malin e Zi, se Rusia mund t’i shënjestronte me raketa balistike, pasi këto tri vende të Evropës Lindore ndaluan fluturimin e aeroplanit me të cilin ministri i Jashtëm rus, Sergei Lavrov duhej të mbërrinte në Beograd.
Rogozin u shkarkua nga posti i kreut të agjencisë ruse të hapësirës në mes të korrikut. Presidenti rus Vladimir Putin emëroi Yuri Borisov, ish-zëvendëskryeministër dhe zëvendësministër i Mbrojtjes, në krye të Roscosmos. /Telegrafi/