Ka nisur seanca plenare e Kuvendit të Kosovës ku në rend dite janë 28 pika. Në sallën e Kuvendit të pranishëm deri tash janë 35 deputetë.
Kryetari i Kuvendit, Kadri Veseli ka kërkuar që të futen në rend dite pikat që kanë mbetur pa përfunduar nga seanca e së premtes.
“Seancat e Kuvendit të datës 16,17,18,20,26 prill 31 maj dhe 1 qershor kanë mbetur ende të hapura”, ka thënë Veseli.
Deputetja e VV-së, Albulena Haxhiu ka thënë se nuk pranojnë që të ndryshohet rendi i ditës.
“Të premten e kaluar seanca ka përfunduar por jo edhe të gjitha pikat sepse nuk kishte kuorum. Është e papranueshme që të ndryshohet rendi i ditës”, ka thënë Haxhiu, duke thënë se për pikat e seancës të së premtes vendos kryesia e Kuvendit se kur duhet të futen në rend dite.
Edhe shefi i Grupit Parlamentar të LDK-së, Avdullah Hoti ka kërkuar që seanca të vazhdojë me pikat e rendit të ditës për të cilat edhe janë ftuar sot në seancë./Telegrafi/
