Nga sulmi rus në qytetin ukrainas Vinnytsia vritet e ëma dhe fëmija i saj njëvjeçar – autoritetet publikojnë pamjet e rënda

Sipas të dhënave të Policisë Nacionale të Ukrainës, 20 persona kanë humbur jetë si pasojë e bombardimit rus në Vinnytsia.

Ndihmë në spital kanë kërkuar rreth 90 persona që janë plagosur, ku 50 prej tyre janë në gjendje të rëndë, transmeton Telegrafi.

Gjithashtu agjencia ukrainase e lajmeve Netxa, ka bërë të ditur se në sulm është vrarë edhe një fëmijë njëvjeçar që në momentin e sulmit gjendej në karrocë dhe pranë kishte të ëmën që gjithashtu humbi jetën.

Fotografitë rrëqethëse tregojnë kufomën e foshnjës pranë karrocës, si dhe këmbën e të ëmës që është këputur si pasojë e shpërthimit.

Lexo po ashtu Sulm me raketa në Vinnytsia të Ukrainës - të paktën 20 të vdekur, në mesin e tyre tre fëmijë

Kujtojmë që tri raketa ruse kanë rënë në një zonë të banuar në qytetin ukrainas Vinnytsia, ku si pasojë humbën jetën 20 persona përfshirë edhe fëmijën njëvjeçar.

E kreu i Policisë Nacionale, Ihor Klimenko duke u thirrur në informacionet preliminare, ka thënë se blloku i ndërtesave kolektive ka pësuar goditje direkte, dhe se janë dëmtuar edhe disa tjera që gjendeshin afër – duke shkaktuar zjarr të madh.

Vinnytsia gjendet rreth 200 kilometra në jugperëndim të kryeqytetit ukrainas, dhe është larg vijave të frontit në jug dhe lindje të vendit. /Telegrafi/