Kryeministri izraelit, Benjamin Netanyahu, ka këmbëngulur se nuk do të ketë armëpushim të përhershëm në Gaza derisa aftësitë ushtarake dhe qeverisëse të Hamasit të shkatërrohen dhe të gjitha pengjet të lirohen.
Deklarata e kryeministrit izraelit vjen pasi presidenti amerikan, Joe Biden, njoftoi se Izraeli i kishte propozuar Hamasit një plan me tre faza që synon arritjen e një armëpushimi të përhershëm.
Edhe pse Hamasi ka treguar tashmë se i sheh propozimet “pozitivisht”, nuk ka asnjë garanci që presioni publik nga Biden mbi Izraelin dhe Hamasin për të pranuar planin do të rezultojë në një marrëveshje.
Madje, zyra e Netanyahut tha se “kushtet e Izraelit për t’i dhënë fund luftës nuk kanë ndryshuar”, shkruan BBC, përcjell Telegrafi.
“Shkatërrimi i kapaciteteve ushtarake dhe qeverisëse të Hamasit, lirimi i të gjitha pengjeve dhe sigurimi që Gaza të mos përbëjë më kërcënim për Izraelin”, thuhet në deklaratën e saj.
Deklarata shtoi se Izraeli do të “vazhdojë të këmbëngulë që këto kushte të përmbushen” përpara se të bie dakord për një armëpushim të përhershëm, duke theksuar se asnjë marrëveshje nuk mund të nënshkruhet përpara përmbushjes së tyre.
Bëhet e ditur se faza e parë e planit për një marrëveshje do të përfshinte një armëpushim të plotë dhe tërheqjen e forcave izraelite nga zonat e populluara, si dhe shkëmbimin e disa pengjeve për të burgosurit palestinezë.
Kjo më pas do të pasohej nga kthimi i të gjitha pengjeve të mbetura të gjallë, përfshirë ushtarët.
Faza përfundimtare do të shihte kthimin e mbetjeve përfundimtare të çdo pengu izraelit të vdekur, si dhe një “plan të madh rindërtimi” me ndihmën e SHBA-së dhe ndërkombëtareve, për të rindërtuar shtëpitë, shkollat dhe spitalet.
Biden ka pranuar se jo të gjithë në Izrael do të pajtohen me planin, por u kërkoi autoriteteve t’i rezistonin presionit.
Megjithatë, ende nuk ka asnjë fjalë nga aleatët e ekstremit të djathtë të kryeministrit Benjamin Netanyahu, të cilët ka të ngjarë të kundërshtojnë propozimin.
Gjithashtu, ata kanë kërcënuar se do të largohen nga koalicioni, gjë që mund të rezultojë në rënien e qeverisë Netanyahu.
Ndryshe, Izraeli ka shtuar sulmet në qytetin kyç të Rafahut javët e fundit, duke pretenduar se ka kontroll operacional mbi të gjithë kufirin me Egjiptin. /Telegrafi/