Mosarritja e përfundimit të sezonit mund të shohë Ligën Premier të humbë një shifër të madhe parash prej 750 milionë funtesh apo 825 milionë eurosh.
Të premten në mëngjes, pas një takimi urgjent, u konfirmua se Liga Premier dhe EFL kanë pezulluar të gjitha ndeshjet deri më 3 prill pas përhapjes së coronavirusit.
Shtyrja përfshin të gjitha ndeshjet në Ligës Premier, Championship, League One dhe League Two, si dhe të gjitha ndeshjet e akademisë dhe ekipeve të të rinjve.
Lajmi vjen pasi Serie A, La Liga, Bundesliga dhe Ligue 1 zgjodhën të ndalonin përkohësisht sezonet e tyre përkatëse.
Sipas mediumit The Times, nëse ky sezon anulohet plotësisht, ai do të vijë me një kosto të madhe.
Liga Premier do t’i humbiste plot 825 milionë euro nga transmetimi i ndeshjeve dhe para nga reklamat apo gjërat tjera komerciale.
Edhe La Liga para disa ditësh u zbulua se do të humbas rreth 700 milionë nga anulimi i kampionatit. /Telegrafi/