Nënkryetari i Lëvizjes Vetëvendosje, Besnik Bislimi ka folur sërish rreth arritjes së koalicionit me Lidhjen Demokratike të Kosovës.
Në një shkrim të bërë në Facebook, Bislimi ka thënë se një sondazh i cili do të fliste për rezultatet e VV-së dhe LDK-së, do ta lehtësonte arritjen e marrëveshjes ndërmjet këtyre dy partive, transmeton Telegrafi.
“Në këto momente shumë të rëndësishme për të ardhmen politike të vendit, një kontribut i madh në largimin e mjegullës dhe mega manipulimit të qytetarëve dhe akterëve politik do të mund të vinte edhe nga institutet që kanë aktivitet primar organizimin e sondazheve serioze me respodentë. Do të ndihmonte shumë nëse do të na tregonin nëse gjendet qoftë edhe një sondazh i vetëm aktual në Kosovë që e nxjerr LDK-në të parën apo qofte edhe një sondazh i vetëm që nuk e nxjerr Lëvizjen Vetëvendosje, fituese të zgjedhjeve të 6 tetorit. Kjo ka mundësi pak a shumë edhe e lehtëson arritjen e marrëveshjes aq të mirëpritur mes VV dhe LDK, sepse ua heq palëve nga dora një pseudo argument që po keqpërdoret pa mëshirë, mes tjerash edhe nga mediat që pozicionimin e kanë brendim dhe obligim”, ka shkruar ai në Facebook.
Po ashtu, Bisilmi ka thënë se do të ishte mirë të ketë edhe një sondazh serioz i cili do të fliste për PDK-në dhe koalicioni AAK-PSD.
“Do të ndihmonte shumë edhe nëse na tregojnë se a ka qoftë edhe vetëm një sondazh serioz që e nxjerrë qoftë PDK, qoftë koalicionin AAK-PSD si lojtar serioz për më lartë se vendin e tretë”, vijon shkrimi i Bislimit.
Ndryshe, kryetari i Vetëvendosjes, Albin Kurti dhe ai i Lidhjes Demokratike të Kosovës, Isa Mustafa, kanë zhvilluar disa takime deri tani rreth mundësisë së arritjes së një koalicioni parazgjedhor./Telegrafi/
