UEFA ka konfirmuar se trofeu i Ligës së Kampionëve nga ky sezon do t’i jepet në fushë skuadrës fituese.
Derisa në vitet e kaluara ekipi triumfues është dashur të ngjitej shkallëve para se t’i merrte medaljet dhe të merrte trofeun, tash e tutje ceremonia do të zhvillohet në fushë.
Ndërsa përveç Ligës së Kampionëve, e njëjta praktikë do të aplikohet edhe në finalen e Europa League dhe finalen e Ligës së Kampionëve për femra.
“Fusha është skena e lojtarëve dhe është shumë më e përshtatshme për t’i festuar arritjet e tyre atje”.
“Njëherësh, është më mirë që zyrtarët të zbresin poshtë nga tribunat te lojtarët – në arenën e tyre dhe t’i respektojnë duke ua prezantuar trofeun dhe medaljet mbi fushën e lojës”, ka thënë presidenti i UEFA-s, Aleksander Ceferin.
Juventusi dhe Real Madridi luajnë në finale të Ligës së Kampionëve këtë sezon (3 qershor), kurse në finalen e Europa League ndeshen Manchester Unitedi dhe Ajaxi (24 maj). /Telegrafi/