Kryeministri i Kosovës, Isa Mustafa, nuk po i përfill fare vendimet e qeverisë së kaluar.
Ish-qeveria e udhëhequr nga Hashim Thaçi kishte vendosur që të hiqte dorë nga fitimet prej procesit të privatizimit të ndërmarrjeve shoqërore. Megjithëse ishte kritikuar si veprim elektoral, kjo u bë me qëllim që të shlyhej borxhi prej 30 milionë eurosh ndaj ish-punëtorëve të fabrikës së tubave nga Ferizaj.
Kryeministri i ri, Mustafa, ka thënë se as qeveria e as AKP-ja nuk kanë mjete të mjaftueshme për ta mbuluar këtë shumë, raporton KTV.
Deklarata e Mustafës bie ndesh me deklaratën e para një muaji të dhënë prej zëdhënësit të Qeverisë, Arban Abrashi. Ky i fundit kishte thënë se shumë shpejt Qeveria do t’i dërgojë në Kuvend emrat e anëtarëve të bordit të AKP-së, në mënyrë që të kryhet kjo pagesë.
Anëtari i AKP-së, njëherësh kryetar i BSPK-së, Haxhi Arifi, nuk dëshiron ta komentojë deklaratën e Mustafës, derisa thotë se AKP-ja i ka në dispozicion vetëm 3.2 milionë, sa ka kushtuar shitja e fabrikës, transmeton koha.net.
AKP-ja përsërit se me kompletimin e Bordit do të diskutojnë për pagesën e punëtorëve të Fabrikës së Tubave. Ditë më parë, kryeministri Isa Mustafa tha se ekzekutivi nuk ka mjete nga Buxheti i Kosovës që t’i paguajë punëtorët e kësaj fabrike.
Ndërkaq, pas kësaj deklarate, grevistët paralajmëruan se do t’i bllokojnë dyert e Qeverisë dhe do të ankohen në Gjykatën e Strasburgut.
