Jose Mourinho nuk është i impresionuar me vendimin për të emëruar Jurgen Kloppin si ‘trajnerin e vitit’, në çmimet më të mira të FIFA-s dhe mendon se Hansi Flick duhej ta kishte fituar çmimin individual.
Të enjten mbrëma Robert Lewandowski u emërua si ‘Lojtari më i Mirë’ nga FIFA për meshkuj, duke mposhtur Lionel Messin dhe Cristiano Ronaldon në këtë garë.
Përderisa ai vendim u pranua nga të gjithë, zgjedhja e Kloppit si trajneri më i mirë nuk është se ka gjetur shumë mbështetje.
Përkundër menaxhimit të Reds drejt një triumfi mbresëlënës të titullit të Ligës Premier, me një hendek prej 18 pikësh, shumë menduan se arritjet e Flick me Bayern Munichun, duke fituar tripletën në sezonin e tij të parë, tejkaluan punën e Klopp për këtë vit.
Kjo ka bërë që Mourinho të mos pajtohet me zgjedhjen e Kloppit dhe të përgjigjet me cinizëm rreth kësaj çështje.
“Mendoj se shansi i vetëm për Flick për të fituar çmimin është nëse Bayerni gjen edhe dy ose tre gara të reja që t’i fitojë”, ka thënë fillimisht Mourinho.
“Kështu që mbase nëse fiton shtatë tituj në një sezon, mbase e fiton çmimin”.
“Besoj se ai fitoi vetëm Ligën e Kampionëve, Bundesligën, Kupën e Gjermanisë, Superkupën e Evropës dhe Superkupën e Gjermanisë. Ai fitoi vetëm pesë trofe, duke përfshirë edhe atë më të madhin nga të gjithë”, përfundoi portugezi. /Telegrafi/