Një mjek i Spitalit të Përgjithshëm në Pejë ka vdekur në vendin e tij të punës këtë të shtunë.
Lajmin për Telegrafin e kanë konfirmuar nga Prokuroria Themelore në Pejë, duke bërë të ditur se dyshimet fillestare janë se bëhet fjalë për vdekje natyrale.
Zëdhënësi i kësaj prokurorie, Shkodran Nikçi, ka thënë se për t’i hequr të gjitha dyshimet, Prokurori i Shtetit ka kërkuar nga Policia e Kosovës që të kontrollohen pamjet e kamerave të sigurisë.
“Prokurori i Krimeve të Rënda dhe Policia e Kosovës kanë dal në vendin e ngjarjes. Dyshimet fillestare janë se është vdekje natyrale. Mirëpo, për t’i hequr te gjitha dyshimet, Prokurori i Shtetit ka kërkuar nga Policia e Kosovës të kontrollohen të gjitha pamjet e kamerave të sigurisë”, ka deklaruar ai.
Vdekjen e mjekut e ka konfirmuar edhe Spitali i Pejës, përmes një njoftimi publik ku bëhet e ditur se i njëjti ka pasur infarkt.
“Të tronditur e jashtëzakonisht të mërzitur nga vdekja e mjekut tonë Specialist, Dr. Reshat Emra. Vdekja nga Infarkti Dr. Reshat Emren e gjeti në vendin e punës në shërbimi të pacientëve në këtë ditë vikendi ku edhe sot ishte kujdestar”, thuhet në njoftimin mortor.
“Shumë netë pa gjumë e angazhim vetëmohues, ky është angazhimi i Mjekëve qe sakrifikojnë shumëçka për ti shërbyer pacientëve. Në situatë të tillë ishte edhe Dr. Reshati ku në krye të detyrës e gjeti dhe vdekja. I paharruar do të jetë gjithmonë kujtimi për ju Dr. Reshat Emra. Pusho i qetë”./Telegrafi/
