Zëdhënësi i ministrisë së Jashtme të Ukrainës, i ka përshkruar veprimet ushtarake të Rusisë gjatë ditës së sotme si “akt lufte”, thuhet në një kumtesë të publikuar në Facebook, shkruan CNN.
“Është një akt lufte, një sulm mbi sovranitetin dhe integritetin territorial të Ukrainës, shkelje flagrante e Kartës së Kombeve të Bashkuara dhe mbi normat fondamentale dhe principet e ligjeve ndërkombëtare”, tha zëdhënësi Oleg Nikolenko, transmeton Telegrafi.
Ai theksoi se trupat ruse kanë kryer sulm mbi qytetet e Ukrainës, një ofensivë që ka për qëllim të shkatërrojë shtetin e Ukrainës, të rrëmbej me forcë territor nga Ukraina dhe të mbaj nën kontroll rajonet e okupuara.
“Ukraina ka të drejtë të mbrojë veten bazuar në ligjet ndërkombëtare”, thuhet ndër tjera në kumtesë – duke theksuar se ushtria ukrainase ishte gati “t’i kundërpërgjigjet agresorit dhe të mbroj tokën e Ukrainës me të gjitha forcat”.
Nikolenko i ka bërë thirrje komunitetit ndërkombëtar që të “veprojë menjëherë” – duke kërkuar sanksione të reja të aplikohen mbi Rusinë dhe të pajisin Ukrainën me mjete ushtarake – për të mbështetur kapacitetet mbrojtëse të këtij vendi. /Telegrafi/