Ministri izraelit i Mbrojtjes, Yoav Gallant, u ka thënë trupave të mbledhura jo shumë larg Rripit të Gazës të enjten se ata “së shpejti do ta shohin” enklavën “nga brenda”, sipas një njoftimi për shtyp nga zyra e tij.
“Ju e shihni Gazën tani nga një distancë, së shpejti do ta shihni nga brenda. Urdhri do të vijë”, tha ai, sipas njoftimit, përcjell Telegrafi.
Deklarata e tij vjen pas asaj të kryeministrit Benjamin Netanyahu, i cili në një vizitë të veçantë në një zonë në kufi me Rripin e Gazës të enjten, u tha trupave të vendosura atje: “I gjithë kombi i Izraelit qëndron pas jush dhe ne do t’i japim goditjen e fortë armiqve tanë në mënyrë që të arrijmë fitoren. Për fitore! Gati?”.
Gjithashtu të enjten, oficeri komandues i Komandës Jugore të Forcave të Mbrojtjes të Izraelit, gjeneralmajor Yaron Finkelman, u tha trupave në një pjesë tjetër të kufirit: “Kjo manovër do ta zhvendosë luftën në anën e armikut dhe ne do të fitojmë në terrenin e tyre. Kjo do të jetë e gjatë, e vështirë, intensive, por ne kemi komandantët dhe luftëtarët më të mirë që IDF ka për të ofruar”.
Deklaratat e tyre vijnë pas asaj të ambasadorit të Izraelit në Kombet e Bashkuara i cili tha se Izraeli “nuk ka interes” për të pushtuar Gazën, por do të bëjë “çfarëdo që të nevojitet” për të eliminuar Hamasin.
Defense Minister Yoav Gallant to troops on the Gaza border: "You now see Gaza from afar, soon you will see it from the inside. The order will come." pic.twitter.com/BwXd6BBAWd
— Emanuel (Mannie) Fabian (@manniefabian) October 19, 2023
Ndërkohë sekretari i Përgjithshëm i OKB-së, António Guterres bëri një apel urgjent të enjten për një armëpushim humanitar midis Hamasit dhe Izraelit.
Ai bëri thirrje për “lirimin e menjëhershëm dhe të pakushtëzuar të pengjeve” të kapur nga Hamasi gjatë sulmit të tij më 7 tetor në Izrael.
Guterres, i cili ndodhet në Kajro, Egjipt, i bëri thirrje gjithashtu Izraelit që të lejojë “qasjen e menjëhershme të pakufizuar të ndihmës humanitare për t’iu përgjigjur nevojave më themelore të popullit të Gazës”. /Telegrafi/