Michelle Yeoh fitoi çmimin “Oscar” për ‘aktoren më të mirë’ në ceremoninë e së dielës mbrëma për rolin e saj si një grua, nënë dhe pronare lavanderie, jeta e së cilës kthehet përmbys kur hidhet në universe të shumta paralele në “Everything, Everywhere All at Once”.
Kjo fitore e bën atë yllin e parë aziatik që fiton ‘aktoren më të mirë’ në historinë 95 vjeçare të Academy Awards.
“Për të gjithë djemtë dhe vajzat e vogla që duken si unë sonte, ky është një fener shprese dhe mundësish”, tha ajo në pranimin e çmimit të saj.
“Kjo është dëshmi se ëndrrat bëhen realitet. Dhe zonja, mos lejoni askënd t’ju thotë se ju ka kaluar koha. Mos u dorëzoni kurrë”.
Ky ishte nominimi i saj i parë për “Oscar” dhe fitorja pas një karriere të bujshme që kalonte midis roleve të mëdha si: “Crouching Tiger, Hidden Dragon” e “Crazy Rich Asians”.
Ajo ishte në nominim me: Andrea Riseborough (“To Leslie”), Cate Blanchett (“Tar”), Michelle Williams (“The Fabelmans”) dhe Ana de Armas (“Blonde”).
Konkurrenca më e madhe e Yeoh ishte me Blanchett, pasi kishte fituar trofeun e ‘aktores më të mirë’ në BAFTA.
Gjatë gjithë kohës, Yeoh ka folur për pengesat me të cilat ajo dhe aktorët e tjerë aziatikë janë përballur në Hollywood.
Sa i përket ‘aktorit më të mirë’, Brendan Fraser ishte fituesi për “The Whale”. /Telegrafi/
