Martesa nuk është gjithmonë e lehtë — madje edhe Michelle Obama ka pasur dikur një shqetësim të madh me bashkëshortin e saj, Barack Obama.
Gjatë episodit premierë të podcast-it të saj të ri, “IMO”, të cilin e moderon së bashku me vëllain, Craig Robinson, ish-Zonja e Parë amerikane foli për një nga zakonet e ish-presidentit amerikan që dikur e kishte bezdisur shumë.
“Barack, e di, duhej të përshtatej me kuptimin që kisha unë për të qenit ‘në kohë’”, tha ajo në këtë podcast.
Michelle Obama shpjegoi se e shqetësonte fakti që bashkëshorti i saj shpeshherë niste të bëhej gati vetëm në momentin kur ishte koha për t’u nisur drejt takimeve apo angazhimeve të tyre.
“E kupton, kam këtë burrë që, kur është ora për t’u nisur — bie fjala, në orën 3 — ai ngrihet dhe shkon në banjë. Dhe unë i thoja: shiko, shiko, nisja në 3 do të thotë që ti i ke mbaruar ato punë më parë, apo jo? Nuk mund të fillosh të kërkosh syzet pikërisht në orën 3, kur është koha për të dalë”, tregoi ajo.
Megjithatë, sipas saj, Barack Obama është përmirësuar ndjeshëm ndër vite.
“Por është përmirësuar gjatë këtyre 30 viteve martesë,” theksoi ajo. Michelle shtoi gjithashtu se vajzat e tyre, Malia dhe Sasha, e dinë se duhet të jenë gjithmonë më herët nëse kanë ndonjë angazhim me të. /Telegrafi/