Një ngjarje e rëndë ka ndodhur sot në mëngjes ku një mësuese është therur me thikë në shkollën “7 Marsi”, në lagjen Kalabria në Prishtinë.
Për gjendjen shëndetësore të pacientes në një prononcim për media ka folur mjekja kujdestare në Qendrën Klinike Universitare të Kosovës (QKUK), e cila tha se i janë bërë të gjitha ekzaminimet e nevojshme.
Ajo tregoi se pacientes me inicialet V.N, 50 vjeçare i janë shkaktuar disa lëndime në zonën abdominale.
“Rreth orës 8:18 kemi pranuar një paciente me inicialet V.P e cila ka pas lëndime në abdomen, tri therje me thikë. Për momentin gjendja e pacientes është stabile. Janë bërë të gjitha ekzaminimet e mundshme, terapia është dhënë dhe tani pranohet në kirurgjinë abdominale”, ka thënë ajo.
Ajo po ashtu tha se pacientja ka qenë mjaft e shqetësuar emocionalisht port tash është stabilizuar gjendja e saj.
Ndryshe, zëdhënësja e Policisë së Kosovës për rajonin e Prishtinës, Flora Ahmeti për Telegrafin ka thënë se sot, në një shkollë në lagjen Kalabria në Prishtinë një mësuese është therur me thikë.
“Sot policia ka marrë informatën se në një shkollë në lagjen Kalabria në Prishtinë, ka ndodhur një përleshje fizike mes dy personave. Menjëherë pas marrjes së këtij informacioni në vendin e ngjarjes kanë dalë të gjitha njësitet e nevojshme policore. Me të dalë në vendin e ngjarjes policia ka konstatuar se ka të bëjë me një rast lëndim trupor ku viktima, V.P femër, 49 vjeç, ka marrë plagë nga arma e ftohtë (thikë) dhe e njëjta është dërguar në QKUK për trajtim mjekësor”, ka thënë zëdhënësja Ahmeti.
Ajo ka shtuar se lidhur me rastin policia ka arrestuar personin e dyshuar B.D femër, 38 vjeç, si dhe është konfiskuar mjeti i cili dyshohet të jetë përdorur në këtë rast.
Aktualisht hetuesit policor janë duke ndërmarrë të gjitha veprimet e nevojshme në përpjekje për ta ndriçuar dhe sqaruar plotësisht rrethanat në të cilat ka ndodhur ngjarja.
Lidhur me rastin ka reaguar edhe kryetari i Komunës së Prishtinës, Shpend Ahmeti.
Përmes një postimi në Facebook, ai ka shkruar se një prind e një nxënëse në parashkollor ka sulmuar me thikë një mësuese edukatore në vendin e saj të punës.
“Sapo vizitova mësuesen në QKUK dhe për fat të mirë ajo është larg rrezikut për jetë. Sulmuesja është arrestuar dhe policia po e heton rastin. Mësueses, që me dekada punon në Komunën tonë për të përcjellur dhe përgatitur gjenerata të parashkollorëve, i urojmë shërim të shpejtë”, ka shkruar kryetari Ahmeti. /Telegrafi/