Ish-ministri shqiptar i Mbrojtjes Fatmir Mediu është paraqitur sot në Prokurorinë e Posaçme SPAK për tu pyetur rreth çështjes së Gërdecit.
Në një deklaratë për mediat pasi doli nga zyrat e SPAK, Mediu tha se nuk e pranon akuzën lidhur me këtë ngjarje.
Mediu u shpreh se ishte prezantuar me akuzën e vitit 2009 dhe jo për aktet. Ai tha se ka kërkuar që të hetohet në mënyrë të drejtë, ndërsa e cilësoi akuzën për shpërdorim detyre të pabazë dhe të motivuar politikisht.
Mediu theksoi se ministri është autoritet civil dhe demontimi i armëve ishte çështje sigurie kombëtare.
“Më është prezantuar e njëjta akuzë. Ajo e 2009, akuzë e motivuar politikisht pa asnjë provë shtesë, shpërdorimi i detyrës. Kam kërkuar që të pyetem që në fillim. Nuk jam pyetur për aktin e firmosur, ka 15 vjet. Qëndrimi im është se jam i pafajshëm. Nuk e pranoj akuzën. Është sipas marrëveshjeve me Pentagonin me praktikat e demontimit me analizë ndërkombëtare” tha Mediu. /Telegrafi/