Mbrojtësi shqiptar i Hellas Verona, Marash Kumbulla ka thënë se Giorgio Chiellini është idhulli i tij dhe se është krenar për ndihmën që Shqipëria i ka dhënë Italisë në luftën kundër coronavirusit të njohur si COVID-19.
Juventusi është ndër klubet që janë lidhur me Kumbullën në muajt e fundit, dhe 20-vjeçari nuk bëri sekret për admirimin e tij për kapitenin e tyre, Chiellini.
“Si djalë i ri, unë kisha një poster të Chiellinit në dhomën e gjumit”, ka thënë fillimisht Kumbulla për Corriere della Sera.
“Gjithmonë e kam admiruar vendosmërinë dhe dëshirën e tij për tu përmirësuar. Ai është një luftëtar i vërtetë në fushë”.
“Sulmuesi që më ka futur në telashe deri më tani është Dybala për shkak të karakteristikave të tij fizike dhe teknike. Ai është shumë i lëvizshëm”.
“Ëndrra ime është të luaj në Ligën e Kampionëve”.
Kryeministri shqiptar, Edi Rama, javën e kaluar dërgoi 30 mjekë dhe infermierë në Itali, duke ndihmuar vendin në luftën kundër coronavirusit.
“Jam krenar për gjestin e kryeministrit Rama në një moment kaq të vështirë për Italinë, e cila ka qenë gjithmonë në anën tonë sa herë që kemi pasur nevojë”.
“Unë e falënderoj atë dhe mjekët që kanë ardhur nga Shqipëria”, përfundoi mbrojtësi shqiptar. /Telegrafi/