Lëvizja Vetëvendosje sërish ka publikuar një video ku ndër të tjera kritikon partitë opozitare, atëherë në pushtet për “amnistimin e kriminelëve serbë me 91 vota në Kuvendin e Kosovës”.
LVV në këtë video ndër të tjera thekson se Qeveria Kurti i ka shpallur si organizata terroriste “Mbrojtjen Civile” dhe “Brigadën e Veriut”, këto dy organizata ku një pjesë e madhe e atyre kriminelëve të falur ishin anëtarësuar për të kryer krime.
Lexoni të plotë postimin e LVV-së:
10 vjet nga amnistimi i kriminelëve serbë me 91 vota në Kuvendin e Kosovës.
Deputetë tash të opozitës, disa tash gazetar e propagandues, në ditën e Masakrës së Srebrenicës patën votuar për amnistimin, faljen, e kriminelëve serbë me 91 vota PËR!
Asnjë pendesë por vetëm tendenca të reja për t’i falur të gjitha krimet e Serbisë prej tyre kemi parë.
Qeveria Kurti i ka shpallur si organizata terroriste Mbrojtjen Civile dhe Brigadën e Veriut, këto dy organizata ku një pjesë e madhe e atyre kriminelëve të falur ishin anëtarësuar për të kryer krime.
Një pjesë e këtyre kriminelëve janë arrestuar dhe të gjithë ata nuk bartin më uniforma të Republikës për të punuar kundër Republikës.
Krimi nuk vjetrohet dhe nuk falet. Drejtësia do të merret me secilin krim dhe kriminel në këtë vend. /Telegrafi/
