Aleksey Yukov “nuk ka vazhduar të numërojë” trupat që ka gjetur në Donbas gjatë pesë muajve të fundit. Ai thotë se mendon se janë më shumë se 300, por nuk mund të jetë i sigurt.
Aleksey dhe njerëzit e tij ngasin një furgon të bardhë frigorifer, të shënuar me një kryq të kuq, për të kryer punën e tyre.
Ata shpesh shkojnë drejt rrezikut për të mbledhur trupat dhe mbetjet e trupave dhe civilëve të vdekur ukrainas dhe rusë.
“Ne punojmë pa ditë pushimi. Vazhdimisht. Ne vozisim, hetojmë, transportojmë, kërkojmë, gjatë gjithë kohës”, ka thënë ai, , shkruan BBC, përcjell Telegrafi.
Sipas Kombeve të Bashkuara, më shumë se 5000 civilë ukrainas janë vrarë që nga fillimi i agresionit të Rusisë në shkurt.
Nuk ka shifra zyrtare se sa trupa ukrainase kanë vdekur.
Por një këshilltar i presidentit Volodymyr Zelensky i tha BBC-së muajin e kaluar se rreth 100-200 ushtarë ukrainas vriteshin çdo ditë.
Aleksey thotë se kjo shifër i tingëllon realiste. Por ai beson se rusët po humbasin trefishin e këtij numri.
Por kush po e fiton luftën, sipas Aleksey?
“Nuk ka të bëjë me atë se kush fiton”, thotë ai. “Ka të bëjë me atë se kush ka të drejtë. Ata [Rusia] erdhën këtu dhe kjo ishte e pafalshme”.
Çdo ushtar ukrainas tha se ata ende besonin se mund të fitonin. Edhe në njësitë që kishin pësuar viktima luftarake të më shumë se gjysmës së trupave.
Por kjo po rëndon mbi të gjallët dhe të vdekurit. Aleksey nuk e ka parë vajzën e tij njëvjeçare prej muajsh.
“Kjo luftë e ka shkatërruar jetën që keni pasur dhe atë që keni ndërtuar”, rrëfen ai.
Sipas shkrimit të BBC, vdekja vjen shpejt në Donbas.
Predhave ruse u duhen vetëm disa sekonda për të rënë, dhe ato po përdoren në sasi industriale.
Mesatarisht, Rusia hedh 20,000 predha artilerie në ditë. Ukraina është në gjendje të përgjigjet me vetëm 6000. /Telegrafi/