Lojtarët dhe stafi stërvitor i Anglisë, përfshirë menaxherin Gareth Southgate, thuhet se janë në linjë për bonuse të mëdha nëse Tre Luanët fitojnë finalen e Kampionatit Evropian ‘Gjermani 2024’.
Anglia do të përballet me Spanjën të dielën mbrëma, pasi mundi Holandën 2-1 për të arritur në finalen e madhe të Euro 2024.
Golat e Ollie Watkins dhe Harry Kane ishin të mjaftueshëm për të siguruar fitoren, me golin e fitores që erdhi vetëm në minutën e fundit.
E diela do të jetë paraqitja e dytë radhazi e Anglisë në një finale të Kampionatit Evropian, me skuadrën e Southgate që humbi në penallti ndaj Italisë në Euro 2020.
Sipas mediumit The Sun, Tre Luanët do të fitojnë një pjesë të shpërblimit nëse e ngrenë trofeun të dielën mbrëma në Gjermani.
Kjo shumë është si rezultat i një negocimi midis skuadrës së Anglisë dhe Federatës Angleze (FA), që do të thotë se lojtarët do të fitojnë një pjesë prej 24 milionë funtesh që federata e futbollit do të merrte për fitimin e turneut.
Pretendohet se shuma e caktuar për lojtarët në rast fitoreje do të ishte 9.6 milionë funte, me atë shumë të ndarë në të gjithë skuadrën.
Southgate do të ishte gjithashtu në linjë për një bonus prej 4.6 milionë funtesh për t’u bërë trajneri i tretë i Anglisë në historinë e vendit që fiton një turne të madh ndërkombëtar, ndërsa ndihmës trajneri Steve Holland do të merrte gjithashtu një bonus të majmë. /Telegrafi/