Zyrtarët e doganave të Lituanisë kanë thënë se kanë kapur dërgesat e furnizimeve ushtarake gjatë rrugës hekurudhore për në Moskë – dhe i kanë dërguar ato direkt në Ukrainë.
Sipas mediave të huaja, përcjell Telegrafi, bëhet fjalë për zyrtarët doganorë që inspektonin vagonët në kufirin jugperëndimor të Lituanisë – dhe për një ngjarje tëndodhur midis 27 shtatorit dhe 2 tetorit.
Ata thanë se trenat po udhëtonin nga Kaliningrad, një enklavë ruse në kufi me Lituaninë dhe Poloninë, për në Moskë.
Zyrtarët shtuan se ngarkesa ishte klasifikuar si ushtarake dhe kishte nevojë për një leje të posaçme.
Dërgesat me gjasë ishin dërguar nga grupe vullnetare ruse që përpiqeshin të mbështesin përpjekjet luftarake të presidentit Vladimir Putin.
Sidoqoftë, ky thuhet se nuk është incidenti i parë që ndodh në rrugën hekurudhore trans-Lituani midis Kaliningradit dhe Moskës.
Lituania, e cila dikur ishte pjesë e Bashkimit Sovjetik, ka qenë një nga aleatët më të vendosur të Ukrainës.
Lituania është ndër disa vende të NATO-s në kufi me Rusinë që po përgatiten për një pushtim të mundshëm rus, duke rritur shpenzimet e tyre ushtarake dhe duke ndërtuar një linjë mbrojtëse përgjatë kufirit kolektiv prej 1,600 kilometrash midis Rusisë dhe Lituanisë, Estonisë dhe Letonisë. /Telegrafi/