Presidenti i Këshillit Evropian, Donald Tusk, ka njoftuar se liderët e BE-së kanë aprovuar një marrëveshje të rishikuar të daljes së Britanisë së Madhe nga BE. Marrëveshja e Brexit do të hyjë në fuqi më 1 nëntor.
“Këshilli Evropian i bëri thirrje Komisionit Evropian dhe Parlamentit Evropian që të lejojnë që marrëveshja të hyjë në fuqi më 1 nëntor 2019”, tha Tusk.
Pas miratimit të konkluzioneve të liderëve të BE-së për marrëveshjen e rishikuar të Brexit, Donald Tusk, tha se ishte arritur një marrëveshje që do të shmangte “kaosin dhe atmosferën e konfliktit midis BE 27 dhe MB”.
Tusk theksoi se versioni i ri i marrëveshjes u pranua sepse kryesisht u aprovua nga Irlanda, por edhe nga Komisioni Evropian që do të thotë se është “i sigurt dhe me përfitim për qytetarët e BE-së”.
“Ndryshimi kryesor është pranimi i inspektimeve doganore gjatë hyrjes në Irlandën Veriore nga kryeministri Johnson. Kjo do të lejojë shmangien e pikave doganore midis Irlandës dhe Irlandës Veriore, dhe gjithashtu do të lejojë integritetin e tregut të vetëm,” tha Tusk.
Ai njoftoi se “hapi i fundit” tani ishte duke pritur konfirmimin e marrëveshjes në të dy parlamentet.
Presidenti i Këshillit Evropian u ka thënë “miqve britanikë” se nëse vendosin të kthehen, “dera për në BE do të jetë gjithmonë e hapur”. /kp/Telegrafi/