Edhe një parti tjetër turke ju bashkua Frontit Europian. Bëhet fjalë për Lëvizjen e Turqve të Maqedonisë për Drejtësi dhe Demokraci. Kreu i BDI-së, Ali Ahmeti, si nismëtar i Frontit Europian, sot nënshkroi marrëveshje koalicioni me përfaqësuesit e kësaj partie, Salih Murat dhe Syleyman Baki.
Në fjalimin e tij, Murat tha se po i bashkëngjiten Frontit me qëllim për ta ndryshuar gjendjen në çdo sferë të shoqërisë veçanërisht gjendjen e komunitetit turk në Maqedoni, duke përmbushur normat e të drejtave të njeriut të parapara në Kushtetutë.
Ahmeti tha se ky Front i përbashkët do të përpiqet për barazi të plotë për të gjithë, sado që të vogël të jenë komunitetet në këtë vend.
“Ky vend është i madh edhe për të vegjlit. Një demokraci e përparuar së pari përkujdeset për komunitetet e vogla. Sepse komunitetet e vogla janë ata që e ndërtojnë lojalitetin ndaj shtetit”, deklaroi Ali Ahmeti.
Ahmeti tha se ky bashkim rreth këtij fronti nuk është i përkohshëm por afatgjatë, për t’i realizuar edhe ato gjëra që kanë mbetur pa i bërë.
Paraprakisht, kreu i integristëve ka firmosur marrëveshje koalicioni edhe me kryetarin e Partisë Demokratike Turke, Bejxhan Iljaz.
Dje një marrëveshje e njëjtë u firmos edhe me Unionin e Romëve, ndërsa më herët marrëveshje për Front Europian, Ahmeti lidhi edhe me Lëvizjen Popullit të Skender Rexhepit, me PDSH-në e Menduh Thaçit dhe me PDE-në e Arjanit Hoxhës. Pritet që një koalicion i këtillë të lidhet edhe me njërën prej partive boshnjake. Të shtunën është paralajmëruar që në Gostivar të nënshkruhet marrëveshja e koalicionit mes Ahmetit dhe Ziadin Selës nga Aleanca për Shqiptarët.