Ministri i Jashtëm rus Sergei Lavrov tha se Rusia nuk do të refuzojë një takim midis presidentit Vladimir Putin dhe presidentit të SHBA-së, Joe Biden në samitin e ardhshëm të G20 dhe do ta shqyrtojë propozimin nëse e merr një të tillë.
Sipas mediave të huaja, përcjell Telegrafi, Lavrov tha në televizionin shtetëror, “Ne kemi thënë vazhdimisht se nuk i refuzojmë kurrë takimet. Nëse ka një propozim, atëherë do ta shqyrtojmë”.
Ministri i Jashtëm rus shtoi se Rusia ishte e gatshme të dëgjonte çdo sugjerim në lidhje me bisedimet e paqes, por nuk mund të thoshte paraprakisht se në çfarë do të çonte ky proces.
Deklarata e tij vjen në të njëjtën ditë kur ai ka thënë se Shtetet e Bashkuara janë përfshirë prej kohësh në konfliktin e Ukrainës.
“Më duket se amerikanët kanë marrë pjesë de facto në këtë luftë për një kohë të gjatë”, tha Lavrov për televizionin shtetëror rus. “Kjo luftë po kontrollohet nga anglo-saksonët”.
Lavrov tha se zyrtarët, përfshirë zëdhënësin e sigurisë kombëtare të Shtëpisë së Bardhë, John Kirby, kishin thënë se Shtetet e Bashkuara ishin të hapura për bisedime, por Rusia kishte refuzuar.
“Kjo është një gënjeshtër”, tha Lavrov. “Nuk kemi marrë ndonjë ofertë serioze për të kontaktuar”.
Ndërkohë Turqia ka bërë thirrje për një armëpushim, duke thënë se të dyja palët po largoheshin nga diplomacia ndërsa lufta u intensifikua.
“Një armëpushim duhet të vendoset sa më shpejt që të jetë e mundur. Sa më shpejt aq më mirë”, ka thënë në një intervistë televizive, ministri i Jashtëm, Mevlut Cavusoglu.
“Ndërsa lufta vazhdon, për fat të keq, situata bëhet më e keqe dhe më e ndërlikuar”.
Ai tha se një proces “i drejtë” duhet të “sigurojë kufirin dhe integritetin territorial të Ukrainës”.
Presidenti turk Rexhep Tajip Erdogan pritet të takohet me Putinin e Rusisë në margjinat e një samiti rajonal në kryeqytetin e Kazakistanit, Astana, të mërkurën. /Telegrafi/