Emisari i BE-së për dialogun, Miroslav Lajçak, ka dhënë deatjepër takimin e 2 majit që do të jetë i nivelit të lartë në Bruksel.
Përmes llogarisë së tij në Facebook, Lajçak ka thënë se do të bëhet prezantimi i draft statutit të parë i Asociacionit, si dhe do bëhet miratimi zyrtar i deklaratës për personat e zhdukur.
“Me takimin e radhës të dialogut të nivelit të lartë që do të mbahet më 2 maj, kjo është një kohë e përgatitjeve intensive. Si takimi i parë i nivelit të lartë pas Ohrit, do të jetë një takim i rëndësishëm për zbatimin e marrëveshjes dhe aneksit të saj”.
“Agjenda do të përfshijë miratimin zyrtar të deklaratës për Personat e Zhdukur, prezantimin e draft statutit të parë të Asociacionit së komunave me shumicë serbe në Kosovë nga ekipi menaxhues dhe çështjet aktuale. Prandaj ne presim që të dyja palët të vijnë në Bruksel të përgatitura mirë dhe plotësisht të përkushtuara në fazën e zbatimit”, ka thënë Lajçak.
Kurti dhe Vuçiq janë pajtuar për Marrëveshjen drejt normalizimit të marrëdhënieve më 27 shkurt dhe për planin e zbatimit më 18 mars.
Ndonëse ato nuk i kanë nënshkruar dokumentet, BE-ja ka thënë se marrëveshjet janë ligjërisht obliguese.
Marrëveshja me 11 nene, e bërë publike më 27 shkurt, nuk e obligon Serbinë që ta njohë Kosovën, por kërkon nga të dyja vendet që t’i pranojnë dokumentet dhe simbolet e njëra-tjetrës, përfshirë: pasaportat, diplomat dhe targat.
Kosova dhe Serbia kanë arritur dhjetëra marrëveshje prej fillimit të dialogut, por shumica e tyre nuk janë zbatuar dhe palët kanë fajësuar njëra-tjetrën për ngecje./Telegrafi/
