Mbrëmë(e shtunë) është mbajtur nata finale e Ligës së Kampionëve mes ekipeve Liverpool dhe Real Madrid.
Nga kjo ndeshje fitues doli ekipi i Real Madridit, i cili fitoi kupën e Ligës së kampionëve për të trembëdhjetën herë.
Për të parë ndeshjen nga afër të mbajtur në “Olimpic Stadium” në Kiev të Ukrainës, të pranishëm kanë qenë shumë prej figurave publike.
Ndër ta, i pranishëm u pa edhe kuzhinier i famshëm turk, Nusret Gocke.
Ai duket se është një fans i madh i Real Madridit, përderisa ka mbështetur në masë të madhe ekipin fitues.
Nusret ka qenë i ulur në anën e tifozëve të Realit përgjatë gjithë lojës, teksa më pas ka shkuar në prapaskenë dhe ka takuar disa prej lojtarëve.
Në rrjetin social Instagram, ai ka publikuar fotografi gjatë takimeve me: Karim Benzeman, Gareth Balen, Marcelon, dhe Luka Modric.
Cristiano Ronaldo gjithashtu shfrytëzoi rastin të bëjë një fotografi me kuzhinierin e famshëm.
Ndërkohë, edhe pse fans i zjarrtë i Realit, Nusret nuk ka hezituar të fotografohet edhe me yllin e Liverpoolit, Mohamed Salah, i cili për fat të keq natën e mbrëmshme ishte vetëm pjesërisht në lojë, kjo për shkak të një lëndimi.
Takimi më i veçantë duket të ketë qenë ai me lojtarin Sergio Ramos pas mbarimit të ndeshjes, ku të dy së bashku kanë realizuar një video në stilin “Nusret”, duke bërë sikur po hedhin kripë mbi kupën e argjendtë.
Fotografitë dhe videot e kuzhinierit të famshëm janë shoqëruar me miliona komente dhe pëlqime nga ndjekësit e tij të shumtë. /Telegrafi/