Shtetet e Bashkuara të Amerikës, Japonia dhe Kina ruajnë lidershipin e globit në ekonomi, ndërsa kanë ndryshuar pozicionet Franca dhe Britania e Madhe. Me interes paraqitet Rusia, e cila, edhe pse ka treguar politikisht “muskujt” gjithë botës këto muaj, shfaqet me një gjendje të përkeqësuar ekonomike.
Ky është rezultati i raportit të publikuar sot, për 30 ekonomitë më të fuqishme të botës. Raporti publikohet për rreth 20 vite radhazi nga Qendra për Kërkimet Ekonomike dhe Biznesin në Londër. CEBR është e pavarur, merr të dhëna dhe bën parashikime, bazuar në analizat e mijëra kompanive private dhe organizatave publike.
Në këtë raport parashikohen edhe zhvillimet për vitin 2015 dhe në vazhdim, ku bëhen parashikime për rritjen e firmave kineze, të cilat mund të kapërcejnë ato amerikane. Me perspektivë pozitive është Gjermania, e cila brenda 10 viteve të ardhshme do të jetë ekonomia e tretë e botës.
Përmirësime në renditje shihen edhe për kompanitë nga vende të tilla, si Italia dhe India, ndërsa përkeqësim shënon Turqia. Në përmirësim janë edhe ekonomitë e Koresë dhe të Hollandës, ndërsa përkeqësohet gjendja në Meksikë. /SHO/