Industria e filmit kosovar ka arritur suksesin më të madh deri më tani duke u futur në “Academy of Motion Pictures Arts and Science”.
Filmi “Shok” u nominua për çmimin Oscar në kategorinë “Best live action short”, duke shënuar historinë si filmi i parë që dërgon Kosovën në festivalin më prestigjioz të filmit.
Mbrëmja gala e shpalljes së fituesve do të mbahet me 28 shkurt në California, ndërsa ende nuk dihet se kush nga Kosova do të jetë prezent në ndarjen e çmimeve.
I kontaktuar nga Telegrafi producenti i filmit, Eshref Durmishi tha se kjo do të mësohet nga mesi i muajit shkurt.
“Ende nuk e dimë saktë se kush do të shkojë, kjo do të mësohet tek në mes të muajit shkurt sepse nuk e dimë akoma se sa persona mund të marrin pjesë”, tha Durmishi.
Kujtojmë se në vitin 2012 Kosova humbi mundësinë për tu futur në garë për çmimin “Oscar” në kategorinë e filmave të shkurtër, shkaku i mosmarrëveshjeve mes ekipit realizues.
Përplasja mbi pronësinë e filmit “Kthimi”, mes regjisores së filmit, Blerta Zeqiri dhe producentit, Blerim Gjoci ka bërë që filmi të mbesë jashtë garës për nominim në “Oscar”, ndërsa sipas Durmishit, probleme të tilla, nuk mund të ndodhin në ekipin e tyre sepse filmi tashmë është nominuar dhe mosmarrëveshje të këtij lloji nuk ka pasur asnjëherë.
Në anën tjetër, Arben Zharku nga Qendra Kinematografike e Kosovës, e cila e ka subvencionuar këtë projekt filmik tha se e gjitha varet nga numri i pjesëmarrësve që do të mundin të marrin pjesë.
“Pse duhet të publikohen emrat se kush do të marrë pjesë?”, u përgjigj fillimisht drejtori i “QKK”-së, i cili më tutje shtoi se gjithçka varet nga numri i ftesave që do të mund të sigurojnë.
“Nuk dihet ende sa vende do të mund t’i sigurojmë, por natyrisht që të parët janë producenti dhe regjisori dhe ndonjë aktor, ndërsa të tjerët vinë me rend”.
Ndryshe ky projekt filmik që shënoi suksesin më të madh në historinë e industrisë kosovare të filmit është bashkëprodhim mes Kosovës dhe Anglisë, xhirimet e të cilit janë realizuar në muajin nëntor të vitit 2014 në Shalë të Bajgorës.
Filmi është i vendosur gjatë periudhës së luftës në Kosovë, kur vendi ishte nën okupimin e Serbisë. Këtu sprovohen kufijtë e miqësisë mes dy fëmijëve të cilët luftojnë për të mbijetuar gjatë luftës në Kosovë.
Në këtë film luajnë: Lum Veseli, Andi Bajgora, Melihate Qena, Aurita Agushi, Eni Cani, Armond Morina, Eshref Durmishi, Sunaj Raca, Luan Kryeziu, Astrit Kabashi, Xhevdet Jashari, Kushtrim Sheremeti, Fisnik Ademi, Besnik Krapi etj. /Telegrafi/
