Ish lideri i Lëvizjes Vetëvendosje, Albin Kurti, ka paralajmëruar se do të jenë më radikalë në hapat e tyre për të penguar ratifikimin e marrëveshjes së Demarkacionit me Malin e Zi.
Kurti në emisionin Rubikon të KTV-së, ka thënë se tryeza e ftuar për këtë çështje është e pamjaftueshme.
“Vetëvendosje do të marrë pjesë në këtë tryezë me grupin e saj parlamentar do të përcaktohen se cilët deputetë do të shkojnë. Kjo tryezë është e mirë por e pamjaftueshme”, ka thënë Kurti, transmeton Telegrafi.
Ai ka shtuar se muaji gusht i viti të kaluar ishte i zi e jo me diell për Kosovën, pasi u nënshkruan marrëveshjet për Asociacionin dhe Demarkacionin.
Kurti ka shtuar se ky muaj gusht mund të jetë i bardhë me një opozitë të fuqishme.
“Ky gusht do të mund të jetë i bardh me një opozitë të fuqishme, dhe lëvizja jonë do ta ketë reagimin edhe më të ashpër do të jemi me radikal se që ishim muaj më parë. Kosova nuk ka tokë për të falur, dhe as plumbat as burgjet e këtij regjimi nuk na ndalin për të penguar ratifikimin e kësaj marrëveshje.
Gushti bëhet i bardhë me gazin lotsjellës dhe me opozitën faqe bardhë”, ka thënë Kurti.
Ai ka thënë se i ashtuquajturi presidenti Hashim Thaçi dhe ministri i Punëve të Brendshme, Skënder Hyseni duhet të japin dorëheqje dhe se kryeministri Isa Mustafa duhet të shkojë pasi që sipas tij, demarkacioni nuk do të ratifikohet.
Kurti ju ka bërë thirrje dy partive tjera opozitare AAK-së dhe Nisma për Kosovën që të rikthehen në Kuvend në mënyrë që opozita të jetë më e fuqishme për të kundërshtuar këtë marrëveshje./Telegrafi/