Lideri i Lëvizjes Vetëvendosje, Albin Kurti ka thënë se secili anëtarë i familjes Jashari sakrifikoi për ketë vend. Mirëpo, siç tha ai, drejtësia për sulmin e Serbisë ndaj kësaj familje as nuk ka nisur.
Kështu tha Kurti derisa bëri homazhe në Kompleksin Memorial “Adem Jashari” në Prekaz në ditën e dytë të Epopesë së UÇK-së.
“Tre breza, gjithsej 59 veta para 23 vjetëve u flijuan në Prekazin historik për lirinë e Kosovës. Baca Shaban dhe nëna Zahide, daja Osman, deri te Kushtrimi 13 vjeç e Igballja e Blerina e vogël, u sakrifikuan për çlirim, për pavarësi, për bashkim, për popullin dhe kombin tonë. Gjysma ishin burra e gjysma gra e fëmijë. Hamza luftoi bashkë më gruan e tij, e Ademi bashkë me gruan. Ndërsa bashkëshortja e bacës Rifat u vra me vajzat e saj dhe djalin”.
“Për këtë sulm shtetëror të Serbisë ndaj familjes legjendare Jashari, askush nuk është gjykuar dhe nuk ka pasur asnjë gjykim për këtë krim shtetëror të Serbisë që dikush të dënohet. Drejtësia është vonuar dhe as s’ka filluar, prandaj ne duhet të angazhohemi që kjo të ndryshojë për hir të Republikës së Kosovës, për hir të pasardhësve të Jasharëve dhe për hir të kombit tonë”, ka thënë Kurti, transmeton Telegrafi.
Ai po ashtu tha se me nderim të përjetshëm përulen para jetës, veprës dhe rënies së Jasharëve, kryekomandantit Adem Jashari.
“Ata e deshën pakrahasimisht më shumë vendin tonë, sesa veten e tyre. Dashuria, kujdesi dhe përgjegjësia institucionale janë mënyra më e sigurt që edhe ne ta duam vendin tonë”, tha Kurti nga Prekazi. /Telegrafi/