Disa serbë po regjistronin popullsinë e veriut të Kosovës, e duke ditur se kjo është ilegale, ka vepruar Policia e Kosovës. Por, reagimi i policisë hasi në një rezistencë të organizuar, e madje përrfundoi edhe me të rrahura ndaj policëve kosovarë nga rreth 60 persona që po ndodheshin në objektin e Kryqit të Kuq në veri.
Ndërkohë, nga burime brenda Policisë mësohet se kush ishte pjesë e këtij grupi që tani do të përballen me ‘sulm ndaj personit zyrtar’. Bëhet fjalë për udhëheqësit e krimit në veri si Milan Radoiçiq e Predrag Vukosavljeviq, të cilët aksionin ndaj policisw e kryen në bashkëveprim më disa persona që në veri njihen si ‘Bradonje’(Mjekrroshat).
E të gjithë këta serbë që sulmuan dhe rrahën zyrtarët policor, shërbejnë nën një ombrellë, e që është udhëheqësi i krimit në veriun e Kosovës, Zvonko Veselinoviq, shkruan gazetametro.net.
‘Janë pjesë e grupit të Zvonko Veselinoviqit. Këta janë që kanë shkaktuar probleme por edhe shkaktojnë akoma për ta ndihmuar Listën Serbe për të fituar në veri’, ka thënë burimi i gazetës.
Por, këta persona nuk janë të panjohur për publikun, pasi kërkohen zyrtarisht nga shteti serb, e në të njëjtën kohë ata në një mënyrë edhe i shërbejnë interesave të tyre në Kosovë. Kjo pasi, siç mëson Metro nga burime në Policinë e Kosovës, ata krijojnë probleme dhe presion për qytetarët serbë të veriut për të votuar Listën Serbe, e që dihet se ajo punon për interesa të Beogradit në Kosovë.
Madje, njerëzit e njëjtë ishin të dyshuar edhe për sulmin ndaj ish-ministrit në Qeverinë e Kosovës, Jabllanoviq.
Po ashtu, gazeta.metrotro kishte raportuar për ‘kokat e krimit’ që kishin marrë pjesë në fushatën e Listës Serbe ne qershor, pjesë e të cilëve janë edhe të përmendurit më lartë, gjë që tregon se lidhjet janë të kahershme dhe mirë të organizuara.
Ndryshe, policët e sulmuar sot në veri ishin pjesë e një aksioni që qëllim kishte konfiskimin e dokumenteve dhe gjërave të tjera që ishin brenda ndërtesës së kryqit të kuq në veri, ku po dyshohej se po organizohej regjistrimi i popullsisë se veriut, e që po bëhet vetëm një muaj e një javë para zgjedhjeve lokale të 22 tetorit. /gazetametro/