Jakup Krasniqi nga Nisma për Kosovën, e ka cilësuar të vonuar propozimin e deputetit të PDK-së, Shaip Muja, për Demarkacionin, duke thënë se mundësia e vetme është që Kuvendi ta thotë fjalën e vet që të mos votohet Projektligji për Demarkacionin.
Ai ka thënë se mundësia e fundit për Demarkacionin është Gjykata e Arbitrazhit.
Sipas tij, gabimin e radhës që e ka bërë Qeveria për këtë problem është se atë ditë me 1 shtator e ka tërheq dhe nuk e ka lënë të votojnë deputetët ngase nuk do të kalonte, duke shtuar se është vullneti i deputetëve që ky ligj të mos kalojë.
Jakup Krasniqi këto komente i bëri në emisionin ‘Rrokum Roll’, ku theksoi se Demarkacioni ka bërë që edhe zhvillimet shoqërore në vend të ngecin dhe qytetarët nuk po shohin zgjidhje, por vetëm si të ikin prej vendit.
Krasniqi ka shtuar se e vetmja zgjidhje për këtë janë zgjedhjet e reja, dhe në zgjedhje demokratike qytetarët munden me zgjedhë dhe me i japë një drejtim të ri vendit. /Telegrafi/
