Ishte një moment që tronditi shumë njerëz në të gjithë botën – presidenti amerikan, Donald Trump duke e kritikuar homologun ukrainas, Volodymyr Zelenskyn se “është njeriu mosmirënjohës” në një përplasje të ashpër mbrëmë në Shtëpinë e Bardhë.
Dhe tani mbështetësit e Ukrainës brenda Partisë Republikane kanë shprehur shqetësime për mënyrën se si kaloi ky takim.
Kongresisti republikan Mike Lawler deklaroi se ky takim ishte një “mundësi e humbur” dhe “fituesi i vetëm këtu ishte presidenti rus, Vladimir Putin”.
Ai gjithashtu tha se ishte “fatkeqësi” që përplasja shpërtheu në publik, shkruan skynews.
“Fituesi i vetëm këtu ishte Vladimir Putin dhe Rusia, sepse një marrëveshje nuk u arrit, dhe kjo është arsyeja pse besoj se është shumë e rëndësishme që Zelensky dhe Trump të kthehen së bashku dhe të punojnë për përfundimin e një marrëveshjeje”, tha ai.
“Kur ky konflikt të marrë fund, dhe do të ndodhë një ditë, Ukraina do të ketë nevojë për investime të konsiderueshme nga SHBA-ja dhe Evropa për ta rindërtuar”, shtoi ai.
Ndryshe, Zelensky dhe Trump nuk arritën marrëveshje për mineralet e rralla të ukrainasve, të cilat i dëshiron me këmbëngulje SHBA-ja. /Telegrafi/