Konfirmohet: Aguero largohet nga Manchester City në fund të sezonit

Manchester City ka njoftuar se Sergio Aguero do të largohet nga klubi në fund të sezonit 2020/2021.

Sulmuesit argjentinas i skadon kontrata në verën që vjen dhe tashmë është konfirmuar se ai nuk do të nënshkruajë kontratë të re.

Aguero iu bashkua Cityt në vitin 2011 nga Atletico Madridi duke u shndërruar në vazhdim në golashënuesin më të mirë të klubit kur e theu rekordin 78-vjeçar të Eric Brook në vitin 2017.

Në 384 paraqitje me Citizens, ai ka shënuar 257 gola dhe konsiderohet si një prej lojtarëve më të mirë në epokën e Ligës Premier dhe golashënuesi më efikas në raport me minutazhin e lojës.

Si lojtar i Manchester Cityt e ka fituar katër herë Ligën Premier, një FA Cup, pesë herë EFL Cup dhe tri herë Community Shield.

Barcelona dhe Paris Saint-Germaini janë dy klube që konkurrojnë për nënshkrimin e 32-vjeçarit. /Telegrafi/