Stafi trajnues dhe stafi mjekësor i Real Madridit kanë bërë një sërë testesh dhe ekzaminimesh në trupin e Cristiano Ronaldos, ndërsa rezultatet kanë treguar se ai e ka gjendjen fizike të një 23 vjeçari.
Sipas të dhënave të publikuara nga AS, 33-vjeçari ka masë yndyrore prej shtatë për qind (7%), ndërsa mesatarja e masës yndyrore për futbollistët tjerë është ndërmjet 10 dhe 11 për qind.
Po ashtu, Ronaldo ka masë muskulore prej 50 për qind dhe sërish nëse krahasohet me futbollistët tjerë, ata nuk arrijnë më shumë se 46 për qind.
Fakti që CR7 mund të shënojë shifra të këtilla në moshën aktuale është diçka e jashtëzakonshme. Edhe pse tashmë nuk është i shpejtë sa ka qenë në të kaluarën, pesë herë fituesi i Topit të Artë, akoma arrin të jetë në nivel me kundërshtarët e tij shumë më të rinj.
Sipas të dhënave që i posedon AS, në vitin 2017, shpejtësia maksimale të cilën e ka regjistruar Cristiano është 33.25 km/h.
Mirëpo, nëse kjo krahasohet me lojtarin më të shpejtë në Ligën Premier, Leroy Sane (Manchester City), i cili ka regjistruar rekord vrapimi prej 35.48 km/h, do të thotë se CR7 nuk është shumë prapa.
Në ndeshjen kundër Juventusit, Ronaldo edhe njëherë e dëshmoi prezencën e tij fizike duke kërcyer mbi 2.3 metra për ta shënuar një prej golave më të bukur në Ligën e Kampionëve.
Se ai gol nuk ishte rastësi, anësori i Realit e ka dëshmuar duke e shënuar një të ngjashëm edhe në stërvitje.
OTRA VEZ 😳 @Cristiano pic.twitter.com/NsiFmhcXN0
— Real Madrid C.F. (@realmadrid) April 7, 2018
Në ndeshjen kundër Zonjës së Vjetër, 33-vjeçari e mahniti botën e futbollit, duke qenë se ai vazhdon të jetë në formë të jashtëzakonshme edhe fizike edhe në aftësitë e tij për lojë. Ndërsa këtë gjë tash e mbështesin edhe raportet mjekësore.
Imagjinojeni Ronaldon duke vazhduar të jetë në formë maksimale edhe në moshën 40 vjeçare. /Telegrafi/