Ronald Koeman ka pranuar se oferta për pozitën e trajnerit të Barcelonës e vë Federatën Holandeze të Futbollit në pozitë të keqe, mirëpo posti në Camp Nou është një ëndërr për ish-yllin e katalunasve.
Pas shkarkimit të Quique Setien, Blaugranët janë në kërkim të një trajneri, ndërsa holandezi është favorit për ta marrë detyrën. Për më shumë, ai ka klauzolë në kontratën e tij me Federatën se nëse e kërkon Barca, mund të largohet.
57-vjeçari është përzgjedhës i kombëtares së Holandës që nga shkurti i vitit 2018 dhe ka regjistruar 11 fitore nga 20 ndeshje, ndërsa luajti në finale të Ligës së Kombeve në vitin 2019.
“Nuk kam pritur që gjërat të zhvilloheshin kaq shpejt dhe nuk është momenti më i mirë. Më befasoi edhe mua, por Barcelona është i vetmi klub për të cilin kam klauzolë në kontratën time. Është e pakëndshme për Federatën Holandeze (KNVB), por jo e papritur”, ka thënë Koeman për FOX Sports.
Në ndërkohë, pritet që Barcelona ta konfirmojë zyrtarisht angazhimin e Koeman si trajner të skuadrës. Për këtë arsye, ish-trajneri i Ajaxit dhe Evertonit nuk dëshiron të spekulojë lidhur me situatën.
“Nuk i dihet kurrë se çfarë mund të ndodhë. Me gjithë respektin, nuk mund të them asgjë në këtë pikë. Do të më pëlqente shumë (ta drejtoja Barcelonën), por situata nuk është e tillë në këtë çast. Akoma nuk ka qartësi. Por, po, jam i hapur”, ka thënë më tej trajneri. /Telegrafi/
Mendoni se Ronald Koeman është zgjedhja e duhur e bordit të Barcelonës? Shprehuni në hapësirën për komente.