Arbenita Pajaziti, Ilhami Gashi, Besim Beqaj, Njazi Kryeziu, Zenun Pajaziti, Fatmir Shurdhaj dhe Sedat Gashi, janë zyrtarët e lartë të vendit të cilët kanë hyrë në rrethin e hetimeve të Prokurorisë, rreth aferës së përgjimeve “Pronto 2”.
Prokuroria Speciale e Republikës së Kosovës, sot ka marrë aktvendim për zgjerimin e hetimit në rastin e aferës së përgjimeve, i cili fillimisht është iniciuar kundër të pandehurit Adem Grabovci, deputet dhe ish-kryetar i grupit parlamentar të Partisë Demokratike të Kosovës.
Përmes një komunikate për media, Prokuroria Speciale njofton se hetimet janë zgjeruar edhe kundër shtatë zyrtarëve të tjerë, përfshirë edhe kryetarin e grupit parlamentarë të PDK-së në Kuvendin e Kosovës.
Ndërkohë KosovaPress merr vesh se emrat e të shtatë zyrtarëve të cilët i bashkohen Grabovcit në rastin e përgjimeve, janë:
Arbenita Pajaziti, ish-shefe e Njësisë për furnizim në Departamentin e farmacisë në Ministrinë e Shëndetësisë.
Ilhami Gashi, ish-sekretar i përgjithshëm në Ministrinë e Punëve të Brendshme.
Besim Beqaj, ish-ministër në Ministrinë për Zhvillim Ekonomik.
Njazi Kryeziu, ish-Kryesues i Kuvendit në Komunën e Prizrenit.
Zenun Pajaziti, kryetar i Grupit Parlamentarë të PDK-së.
Fatmir Shurdhaj, ish-zëvendës ministër në Ministrinë e Punës dhe Mirëqenies Sociale.
Sedat Gashi, ish-këshilltar politik në Ministrinë e Punëve të Brendshme.