Një video amatore shfaq atë që duket një aeroplan luftarak rus i cili rrëzohet nga qielli – kurse ngjarja është dokumentuar nga piloti i cili me telefon të mençur filmoi veten duke zbritur në tokë me parashutë – pasi ishte katapultuar për t’i shpëtuar më të keqes.
Videoja është publikuar në një kanal në Telegram nga blogeri rus i luftës Kirill Fedorovo, kurse pamjet janë shpërndarë edhe nga zyrtari ukrainas Anton Gerashchenko – ku shihet aeroplani duke rënë në tokë – i përfshirë nga zjarri, transmeton Telegrafi.
Kushdo që e ka parë videon ka menduar se ishte filmuar ngjarja nga droni, por ishte piloti i cili u katapultua dhe shihej me maskë oksigjeni në gojë si dhe helmetë në kokë.
Ai mbante me njërën dorë telefonin dhe filmonte momentin kur ai po zbriste në tokë, dhe dëgjohet duke thënë se e kanë rrëzuar ukrainasit.
“E ndeza GPS-në por nuk kishte sinjal… nuk patëm kohë të arrijmë të kryejmë misionin. Gjithçka ka përfunduar”, tha piloti rus. /Telegrafi/
